JELA KWA BAKULI LA NYAMA

Advertisement

Wanaume wawili wamefungwa jela kwa mwezi moja kila mmoja kwa kukataa kulipa bili ya KSh 130. Bili hiyo ilikuwa ya kitoweo cha nyama walichoagiza katika hoteli moja Mombasa. Hakimu Mkuu Mkazi wa Mombasa Edgar Kagoni katika hukumu yake alisema wawili hao walistahili hukumu kali ili kuzuia wengine walio na tabia kama hiyo. “Sheria inaniruhusu niwape hukumu ya juu zaidi kuambatana na makosa yenu, tabia kama hiyo inafaa kuzuiwa,” alisema. Hakimu huyo alisema haikuwa sawa kwa washukiwa hao kuingia kwa mkahawa na kula chakula cha wenyewe na kuondoka bila kulipa.  “Washukiwa wamefungwa mwezi mmoja au faini ya Sh5,000,” alisema. Wakili wa serikali Lilian Fundi aliomba mahakama kuwachulia washtakiwa hao kama wakosaji kwa mara ya kwanza. 
Peter John na Martin Mwangi walishtakiwa kwa kutatiza amani na kutishia kumchoma kisu mhudumu wa mkahawa Vincent Mulwa. Waendeshaji mashtaka walisema kisa hicho kilifanyika eneo Makande, Ijumaa, Mei 11. 
Kwa kujitetea, Mwangi alisema alijutia kitendo chake na kuongeza kuwa alikuwa mlevi “Sikujua nilichokuwa nikifanya, nilikuwa mlevi, ninaomba mahakama inisamehe ili nirejee nilipe chakula hicho,” alisema. 
Wakati wa kisa, mlalamishi alikingwa na wateja wengine wakati wawili hao wakimtishia kumchoma kisu kwa kutaka kupewa pilipili baada ya kuwekewa supu hiyo ya KSh 130.

Share This